Kategoria Perretxikoak

Izen arrunta: San Martin ziza.

Gaztelaniaz: Cabeza de fraile.

Katalanez: Pampa.

Ingelesez: Trumpet agaric.

Frantsesez: Tête de moine.

Txapela kolore erre argikoa du, isla gorriekin, gamuza argia, lehenengo ganbil laua ertz biribilkatuarekin, baina gero oso inbutu-formakoa, titi txiki kamuts batekin erdian; ertza pixka bat arraildua batzuetan. Lamela dekurrente eta finak, kolore krema edo horikoak eta zerbait elastikoak. Hanka argixeagoa du, zuntz gehiagorekin, oinalde handitu eta iletsuarekin.

Mami sendo ia zuria, bigun samarra, usain atsegin baina ahulekoa. Jateko ona da, azido zianhidrikoa daukan arren; oso kopuru txikian baitauka, eta horregatik, ez du inoiz trastornorik sortzen.

Batez ere lameletan daukan usain bereziak salatzen du azido horren presentzia. Clitocybe zuriak ez biltzea gomendatzen da. Batzuk oso toxikoak dira-eta. Ez da hain sarri aurkitzen espezie hau; basoko zoru hezeetan ateratzen dira, multzo edo zirkulutan gehienetan, eta gainera leku beretan agertzen dira hainbat urtez, zenbaitetan oso talde ugariak osatuz denboraldi-bukaeran.