Amanita muscaria

Kategoria Perretxikoak

Amanita muscaria edo kuleto faltsua, onddo basidiomizete arrunta da, Agarikaleen ordenakoa.

Muscaria izena latinezko musca (euli) hitzetik dator, eta onddo hauen eta intsektuen arteko interakzioari egiten dio erreferentzia. Izan ere, perretxiko honek berarekin kontaktua egiten duten intsektuak aldi baterako paralizatzen ditu.

  • Tamaina: 10 eta 20cm bitartean.
  • Kolorea: Gorria, puntu zuriekin.
  • Txapel forma: txapelak 10 eta 25cm bitarteko diametroa izan ohi du. Globo forma dute lehenik, gero ganbila, eta, azkenik, laua, amanita gehienek dutena bezalakoa. Kutikula gorria du, eta, denbora pasa ahala, laranja bihurtzen da. Errezel orokorraren arrasto zuriak daude kutikularen gainean. Kotoi itxurakoak dira horiek, eta zirkulu zentrokideetan kokatuta egoten dira. Kolore txuri hori, pixkanaka, horitu egiten da. Perretxiko hau mamitsua, trinkoa eta erakargarria da. Ertzak kurbatu gabeak dira eta apur bat ildaskatuta egon ohi dira, heldutasunaren ondorioz.
  • Oina: zilindro formakoa, txapeletik banatzeko erraza, zuri horixka, zuzena, sendoa, betea eta eraztunarekin. 12-20 cm-ko altuera eta 1-3 cm-ko diametroa izan ohi ditu.
  • Eraztuna zabala da, mintz askokoa, eta ertza hori kolorekoa du.
  • Oinaren oinarria klabiformea da, bolba batez inguratutakoa, zuria.